Biofaol qo‘shimchalarni, ayniqsa ozdiruvchi vositalarni mutaxassis tavsiyasisiz iste’mol qilish oqibatida kelib chiquvchi noxush holatlar,salomatlikka ta’siri haqida

Biofaol qo‘shimchalar (BFQ) va ozdiruvchi vositalarni shifokor yoki mutaxassis tavsiyasisiz qabul qilish inson salomatligi uchun jiddiy xavf tug‘dirishi mumkin. Ko‘pchilik tez vazn yo‘qotish maqsadida bunday mahsulotlarni nazoratsiz iste’mol qiladi, ammo bu turli noxush oqibatlarga olib kelishi ehtimoldan xoli emas.

Jumladan, ozdiruvchi vositalar yurak urishining tezlashishi, qon bosimining oshishi, bosh og‘rig‘i, bosh aylanishi, uyqusizlik, asabiylik va ruhiy holatning buzilishiga sabab bo‘lishi mumkin. Ayrim hollarda ular jigar va buyrak faoliyatiga salbiy ta’sir ko‘rsatib, ushbu a’zolarning zararlanishiga olib keladi.

Shuningdek, tarkibi noma’lum yoki sifat nazoratidan o‘tmagan biofaol qo‘shimchalar allergik reaksiyalar, oshqozon-ichak faoliyati buzilishi, suvsizlanish hamda organizmda vitamin va minerallar yetishmovchiligini keltirib chiqarishi mumkin.

Ozdiruvchi vositalarni uzoq muddat va me’yordan ortiq qabul qilish moddalar almashinuvi jarayonining izdan chiqishiga, gormonal muvozanatning buzilishiga ham sabab bo‘ladi.

Shu bois, har qanday biofaol qo‘shimcha yoki ozdiruvchi vositani qabul qilishdan oldin shifokor bilan maslahatlashish, mahsulotning tarkibi va xavfsizligi haqida to‘liq ma’lumotga ega bo‘lish muhim hisoblanadi. Sog‘lom ovqatlanish, muntazam jismoniy faollik va to‘g‘ri turmush tarzi vaznni nazorat qilishning eng xavfsiz va samarali usullaridir.

https://t.me/sanepidqom_qarshitum